வெளிநாடு | அரசியல் | 2020-05-02 06:13:44

மூன்று வாரங்களின் பின்னர் பொதுமக்கள் முன் தோன்றினார் வட கொரிய ஜனாதிபதி கிம் 

கடுமையான உடல் நலக் குறைவினால் பாதிப்புற்றுள்ளதாக ஊடகங்களில் கூறப்பட்டு வந்த வட கொரிய ஜனாதிபதி கிம் ஜோங் உன் மக்கள் முன் தோன்றியுள்ளதாக வட கொரிய ஊடக நிறுவனமொன்று செய்தி வெளியிட்டுள்ளது.

Korean Central News Agency (KCNA) எனப்படும் குறித்த ஊடக நிறுவனமானது சனிக்கிழமை (02/05/2020) காலை வெளியிட்டுள்ள செய்தியில் ஜனாதிபதி கிம் பசளை உற்பத்தி தொழிற்சாலையில் இடம்பெற்ற வைபவம் ஒன்றில் கந்துகொண்டுள்ளதாகக் குறிப்பிட்டுள்ளது.

சஞ்சியோன் நகரில் நிர்மாணிக்கப்பட்டுள்ள குறித்த தொழிற்சாலையின் கட்டுமானப் பணிகள் பூரணமடைந்ததனைத் தொடர்ந்து அத் தொழிற்சாலையினை திறந்து வைப்பதற்கான வைபவத்திலேயே இவர் கலந்துகொண்டுள்ளார். மேற்படி நிகழ்வில் ஜனாதிபதி கிம் இன் சகோதரி கிம் யோ ஜோங் உட்பட வட கொரிய அரசின் முக்கிய அதிகாரிகளும் கலந்துகொண்டுள்ளனர்.

ஜனாதிபதி கிம் 2011 ஆம் ஆண்டில் பதவியேற்றதில் இருந்து வட கொரியாவின் முன்னாள் ஜனாதிபதியான தனது பாட்டன் கிம் இல் சுங்`இன் பிறந்தநாள் நிகழ்வினைத் தவற விட்டிருந்ததில்லை. எனினும் கடந்த ஏப்ரல் 15, 2020 இல் நடைபெற்ற குறித்த நிகழ்வில் கிம் பிரசன்னமாயிருக்காமை பல சர்ச்சைக்குரிய செய்திகளுக்கு வழிவகுத்தது.

மிகவும் இறுக்கமான ஊடக சட்ட திட்டங்கள் உள்ள நாடாக காணப்படும் வட கொரியாவில் அரச தணிக்கையற்ற செய்திகைளை பதிவிடுவது முற்றாகத் தடை செய்யப்பட்டுள்ளது.

கிம் மற்றும் அவரது உடல் நிலை குறித்ததான இரு நிலைப்பாடான கருத்துக்களைத் தென் கொரியா தெரிவித்துவந்த போதிலும் அவர் தனது நாளாந்த செயற்பாடுகளை வழமைபோன்று செய்து வந்ததாக வட கொரிய ஊடகங்கள் தெரிவித்து வந்தன. இருப்பினும் அது குறித்ததான புகைப்படகளோ காணொளிகளோ வெளியிடப்படாமை பெரும் சந்தேகத்தினை ஏற்படுத்தியிருந்தது.

இந்நிலையிலேயே, சர்ச்சைகளுக்கு முற்றுப்புள்ளி வைக்கும் வண்ணம் ஜனாதிபதி கிம் குறித்த வைபவத்தில் கலந்துகொண்டுள்ளதாக செய்தி வெளியிடப்பட்டுள்ளது.

இதே போன்று 2014 ஆம் ஆண்டிலும் தொடர்ச்சியாக ஆறு வாரங்கள் கிம் பொது மக்கள் முன் தோன்றாது இருந்தமை குறிப்பிடத்தக்கது.


Related Posts

Our Facebook

GENERAL ELECTION-2020 - DIGAMADULLA DISTRICT

GENERAL ELECTION-2020 -DIGAMADULLA DISTRICT

GENERAL ELECTION-2020

Popular Posts